İspaniya Avropa İttifaqına (Aİ) üzv olan digər dövlətlərlə birlikdə COVID-19 infeksiyasına qarşı Oksford Universitetinin (Böyük Britaniya) tədqiqatçıları tərəfindən “AstraZeneca” şirkətində hazırlanmış vaksinlərin Avropa Komissiyası (AK) vasitəsilə həyata keçirilən mərkəzləşdirilmiş qaydada alınmasına qoşulub.

Aztibb.az İspaniya Səhiyyə Nazirliyinin məlumatına istinadla xəbər verir ki, vaksinlər ölkələr arasında əhalinin sayına görə bölüşdürüləcək. Bu bölgüdə İspaniyanın payına 30 milyon dozalıq vaksin düşür.

AK ən qabaqcıl alternativlərdən sayılan “AstraZeneca” şirkətinin vaksinlərinin mərkəzləşdirilmiş qaydada alınması barədə son həftələrdə razılıq əldə edib. Hazırda bu vaksinin təhlükəsizliyini və effektivliyini təmin etmək istiqamətində klinik sınaqlar keçirilir. 

AK-nin danışıqlar komitəsi İspaniyanın qoşulduğu bu ilk razılaşmaya əlavə olaraq, Aİ-nin və üçüncü dünya ölkələrinin vaksinə olan tələbatlarını ödəmək məqsədilə alternativ vaksinlər hazırlayan müxtəlif şirkətlərlə danışıqları davam etdirir.