Qərbi Afrikada yerləşən Qvineyada yüksək yoluxuculuq qabiliyyətinə malik təhlükəli Marburq qızdırmasının yayılması barədə xəbərdarlıq edilib. Ümumdünya Səhiyyə Təşkilatının (ÜST) məlumatına görə, bu, Qərbi Afrikada həmin virusun yayılmasına dair ilk xəbərdir.
Aztibb.az xəbər verir ki, Qvineyada Ebola epidemiyasının yayılmasından iki ay sonra ölkənin Quekedu prefekturasında Marburq qızdırması barədə məlumat narahatlıq doğurub. Virus artıq vəfat etmiş bir pasiyentdə aşkarlanıb və onunla təmasda olmuş şəxslərin müəyyən edilməsinə başlanılıb.
Qeyd edək ki, Ebola virusu kimi yarasalar vasitəsilə insana keçən Marburq virusu yüksək qızdırma və daxili qanaxmalara səbəb olur. Yüksək yoluxuculuq qabiliyyətinə malik olan bu virus insanlar arasında yaxın təmaslar zamanı damcı yolu ilə keçir. Əsasən Mərkəzi Afrika mənşəli olan virus ilk dəfə ötən əsrin 60-cı illərində Almaniyanın Marburq şəhərindəki laboratoriyaların birində heyvanlar üzərində aparılan təcrübə zamanı aşkarlanıb və ona görə də ona Marburq qızdırması adı verilib.
ÜST-ün məlumatına görə, bu virusa qarşı antiviral dərman və ya peyvəndlər hələlik mövcud deyil. Koronavirus pandemiyasına qarşı mübarizə prioritet olduğuna görə, səhiyyə qurumlarının bu virusa qarşı mübarizəsində bir sıra çətinliklər yarana bilər. Ona görə ÜST rəsmi qurumları virusun yayılma arealını mümkün qədər qısa zamanda müəyyən etməyə çağırıb.