Pandemiya səbəbindən son dövrlər məhsulların daşınması və saxlanılması zamanı qablaşdırılmasına xüsusi önəm verilir. Getdikcə tələbatın artdığı streç film məhsulundan artıq bütün sənaye, emal, nəqliyyat və xidmət sahələrində istifadə olunmağa başlanılıb.
Bu barədə məlumatı AMEA Yüksək Texnologiyalar Parkının rezidenti olan “Bakı Polimer İstehsalat” MMC-nin direktoru Cavid Hüseynov verib.
Onun sözlərinə görə, “Bakı Polimer İstehsalat” MMC qablaşdırma materiallarının idxalçısı kimi fəaliyyətə başlasa da, artıq bir sıra digər məhsulları ölkə daxilində istehsal edir. Bu məhsullara qida və sənaye streçi, yapışqan lentlər və s. aiddir:
"Qida və qeyri-qida məhsullarının istehsal resepturası fərqlənir. Qida streçinin istehsalı zamanı insan sağlamlığına zərər verməyən xammallardan istifadə olunur. Eləcə də, şirkətimizin keyfiyyətə nəzarət edən əməkdaşları hər partiyadan yoxlama məqsədləri üçün nümunələri test edirlər."
