Təəssüf ki, iyunun sonlarından başlayaraq ölkəmizdə koronavirusa yoluxma hallarında mənfi tendensiya müşahidə olunur. Belə ki, COVID-19-a yoluxanların sayı həmin xəstəlikdən sağalanların sayını üstələyir. Son statistikaya görə, yoluxma sayı dördrəqəmli ədədlərlə ifadə olunur. Belə ki, avqustun 5-də COVID-19-a 1196 yeni yoluxma faktı qeydə alınıb. Doğrudur, bir sıra məhdudiyyətlərin ləğvindən sonra bu, gözlənilən idi. Lakin yenidən əks tendensiyanı görmək həm narahatverici, həm də üzücüdür. Buna baxmayaraq, ölkədə sanitar epidemioloji vəziyyət hələ ki, nəzarət altındadır.
Aztibb.az xəbər verir ki, bunu Bakı Sağlamlıq Mərkəzinin İnfeksiyaya nəzarət bölməsinin rəhbəri Ləman Qalimova deyib.
Pandemiya ilə mübarizədə ən effektiv vasitənin vaksinasiya olduğunu bildirən mütəxəssis ölkəmizdə gündəlik peyvənd olunanların sayının qənaətbəxş olduğunu qeyd edib: “Ölkəmizdə hər gün koronavirus əleyhinə vaksinasiyadan keçənlərin sayı kifayət qədər olsa da istədiyimiz saya çatmadığımız üçün hələ də pandemiya davam edir. Qarşıdan payız mövsümünün gəldiyini və respirator xəstəliklərin aktivləşəcəyini nəzərə alaraq maksimal dərəcədə diqqətli olmaq, fərdi qoruyucu vasitələrdən düzgün istifadə etmək, gigiyena qaydalarına riayət etmək, sosial məsafəni gözləmək vacibdir. Həmçinin çəkinmədən vaksinasiyada aktiv iştirak önəmlidir. Peyvəndlənən vətəndaşlar da arxayınlaşmamalı və hər zamankı tələblərə qarşı məsuliyyətli olmalıdırlar. Həm vaksinasiyada aktiv iştirak etməklə, həm də məsuliyyətli davranmaqla bu bəladan qurtula bilərik”.