Bu gün Azərbaycan Tibb Universitetinin (ATU) Tədris Cərrahiyyə Klinikasında Almaniya, Rumıniya və İtaliyadan praktikaya gələn tələbələrlə görüş keçirilib.

 

Aztibb.az xəbər verir ki, görüşdə ATU-nun beynəlxalq əlaqələr üzrə prorektoru, dosent Orxan İsayev universitetin xarici ali təhsil müəssisələri ilə əməkdaşlığı, müştərək layihələr və elmi araşdırmalar barədə ətraflı məlumat verib.

 

ATU ilə dünyanın bir sıra aparıcı universitetləri arasında əməkdaşlıq memorandumlarının imzalandığını deyən prorektor bunun sayəsində həmin ali məktəblərlə uğurlu tələbə mübadiləsinin həyata keçirildiyini bildirib. Orxan İsayev qeyd edib ki, universitetin Həkimlər və Təbib Tələbələr Birliyi ilə uzun illərdir əməkdaşlıq əlaqələri mövcuddur. Bu əməkdaşlıq çərçivəsində əcnəbi tələbələr hər il ATU-nun müxtəlif klinikalarında yay praktikası keçirlər.

 

Daha sonra prorektor O.İsayev tələbələri maraqlandıran sualları cavablandırıb, onların rəy və təkliflərini dinləyib.

 

Tədris Cərrahiyyə Klinikanın baş həkimi, professor Ramiz Poluxov əcnəbi tələbələrin praktika keçməsi üçün yaradılan şəraitdən danışıb. Onun sözlərinə görə, tələbələrin hər birinə kurator təyin edilib. Bu müddət ərzində avropalı gənclər ATU həkimlərinin apardığı maraqlı cərrahiyyə əməliyyatlarında iştirak edib, müayinə və müalicə proseslərini yaxından izləyiblər. Professor R.Poluxov birgə əməkdaşlığın gələcəkdə müsbət nəticələr verəcəyinə əminliyini ifadə edib.

 

Görüş zamanı Avropa ölkələrindən olan tələbələr də onlar üçün yaradılan şəraitə görə ATU rəhbərliyinə təşəkkür ediblər. Qeyd ediblər ki, ATU-nun Tədris Cərrahiyyə Klinikasında praktika müddətində maraqlı təlimlərdə iştirak edib, tanınmış alimlərdən dərs alıb, modern tibbi mulyajlar üzərində işləyiblər. 

 

Qeyd edək ki, görüşdə Tədris Cərrahiyyə Klinikasının tədris işləri üzrə müdir müavini, professor Davud Pənahov, ATU-nun Ümumi cərrahlıq kafedrasının müdiri, professor Elçin Ağayev, Qulaq, burun və boğaz xəstəlikləri kafedrasının müdiri, professor Vəfa Pənahian, Beynəlxalq əlaqələr şöbəsinin müdir müavini Nigar Ələkbərova və Həkimlər və Təbib Tələbələr Birliyinin Milli Mübadilələr üzrə koordinatoru Aqil Vəlizadə də iştirak edib.