"Patı" qəbul edənlərdə şizofreniya halları müşahidə edilir - Psixoloq
23.07.2021 12:03

Narkotik maddə olan metamfetamin (Patı) qəbul edənlərdə şizofreniya halları müşahidə edilir.

 

Aztibb.az-ın məlumatına görə, bunu psixoloq Orxan Farəcli bildirib.

 

O, pasiyenti olan gənc oğlanda belə problemlərin yarandığından bəhs edərək vurğulayıb:

 

"Pasiyentim düşünür ki, pərdə hansısa şəkildə dayanırsa, bu kənardakılara mesajdır, proseslər Çindən idarə olunur, həyat yoldaşı ona xəyanət edir və s. Bu cür insanların çox ciddi psixoloji dəstəyə, xəstəxanaya yatırılmalarına ehtiyac var. Çünki insan daim həyat yoldaşının ona xəyanət etdiyini düşünür və o qadın daim təhlükədədir".

 

Psixoloq regionlarda "Patı", "Şüşə"nin çox geniş yayılmasına da münasibət bildirib: "Hətta o dərəcədə ki, insanlar kim tərəfindən, harada satıldığını bilirdilər. Ona görə də son vaxtlar hüquq mühafizə orqanları tərəfindən həyata keçirilən əməliyyatlar çox doğru, lakin gecikmiş əməliyyatlardır. Bunun ictimaiyyətə açıqlanmasını doğru sayıram. Çünki açıqlanmadıqca, vəziyyət nəzarətdən çıxır. Bunun bir növ narkotik vasitələrin təbliğatı olduğu qənaətində deyiləm".