Almaniyanın Köln Universiteti Klinikasının İnsult mərkəzi Avropa İnsult Təşkilatı tərəfindən insult xəstələrinin müalicəsində Avropanın ən yüksək sertifikasiyası səviyyəsinə layiq görülüb. Bu günə qədər isə Almaniyada yalnız 12 klinika Avropa İnsult Təşkilatının ciddi keyfiyyət meyarlarına cavab verərək belə yüksək sertifikasiyaya layiq görülüb.
Aztibb.az xəbər verir ki, bu barədə Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının şöbə müdiri, tibb elmləri doktoru Nuran Abdullayev məlumat verib.
O, bildirib ki, Avropada hər il təxminən 1,5 milyon insan insult keçirir, bunların da 270 000-i Almaniyanın payına düşür. Ümumiyyətlə isə dünyada hər il insultdan əziyyət çəkən xəstələrin sayı artır və bu da onlara göstərilən xidmətlərin daha da mükəmməlləşdirilməsini tələb edir. İnsult insan ölümünün ikinci əsas və daimi əlilliyin ən çox rast gəlinən səbəblərindən biridir:
"Bu gün elm birmənalı olaraq sübut edir ki, insultun ağır nəticələri xəstənin nə qədər tez və peşəkar şəkildə müalicə olunmasından birbaşa asılıdır. Müalicənin isə xüsusi ixtisaslaşmış mərkəzlərdə aparılması insultdan sonrakı mərhələdə çox böyük əhəmiyyətə malikdir".