ABŞ Prezidenti Donald Tramp Ağ Evdə keçirilən mətbuat konfransında Qida və Dərmanların Keyfiyyətinə Nəzarət üzrə İdarənin yeni növ koronavirusa (COVID-19) qarşı plazma müalicəsini təsdiqlədiyini açıqlayıb.
Koronavirusdan sağalmış xəstələrdən qan plazması alınaraq tətbiq ediləcək müalicənin fövqəladə vəziyyətlərdə istifadəsinə icazə verildiyini söyləyən Prezident Tramp müalicənin nəticələrinin təxmin edilən risklərdən daha üstün olduğunu bildirib.
"Bu gün alacağımız qərar, xəstələrin müalicə imkanlarını xeyli asanlaşdırcaq. Biz lazımsız maneələri aradan qaldırırıq", - deyə Tramp qeyd edib.
ABŞ Prezidenti daha əvvəl plazma müalicəsini təsdiqləməməsini siyasi səbəblərlə əlaqələndirib. O, plazma terapiyasının koronavirus xəstələrinin müalicəsində səmərəli olacağını deyərək, bu xəstəlikdən sağalanları qan və plazma bağışlamağa çağırıb.