Aztibb.az xəbər verir ki, Hemofiliyalı Xəstələrin Respublika Assosiasiyasının sədri Ayaz Hüseynov Milli Hematologiya və Transfuziologiya Mərkəzinin fəaliyyəti ilə bağlı müsahibəsində belə deyib.

 

23 dekabr 2019-cu il tarixdə cənab Prezident İlham Əliyevin Fərmanı ilə yaradılmış Mərkəzinin fəaliyyəti ilə bağlı fikirlərini bölüşən Ayaz Hüseynov 2020-ci ildən əvvəlki vəziyyətin çox ağır olduğunu bildirib:

 

“Məhz Milli Hematologiya və Transfuziologiya Mərkəzi təsis edilənə qədər hemofiliya və digər laxtalanma pozğunluğundan əziyyət çəkən insanların durumu qənaət bəxş deyildi. Belə ki, hemofiliyalı pasiyentlərin müalicəsində əvəzsiz olan qanın laxtalanma faktor preparatları beynəlxalq kriteriyalarla minimal təchizat 2 dəfə aşağı idi. 

 

Baxmayaraq ki, hemofiliya xəstəliyi üzrə  Dövlət Proqramı mövcuddur. Bu da o deməkdir ki, pasiyentlərin yalnız sağ qalma məqsədi ilə istifadə edilən laxtalanma dərman preparatları profilaktikaya yetmirdi və bunada görə uşaqların əksəriyyətinin oynaqlarında fəsadlar müşahidə olunur. Halbuki, normal dərman təchizatı olsa,  pasiyent tam olaraq sağlam və heç bir fəsadsız həyat sürə bilər“.

 

Təşkilat sədri bildirib ki, 2020-ci ilin əvvəlində Milli Hematologiya və Transfuziologiya Mərkəzi yarandıqdan sonra 2006 -ci ildən maliyyələşən Hemofiliya üzrə Dövlət Tədbirlər Planı  Milli Hematologiya və Trasfuziologiya Mərkəzinə təhvil verilmişdir.

 

Hemofiliyalı Xəstələrin Respublika Assosiasiyasının sədri Ayaz Hüseynov prosesə başlanandan dərhal sonra ilk dəfə Milli Hematologiya və Trasfuziologiya Mərkəzinin icraçı direktoru Dr. Valeh Hüseynovla görüşdüyünü bildirir:

 

“Görüş zamanı mövcud hemofiliya və digər qanda laxtalanma pozğunluğu ilə olan pasiyentlərin durumu haqqında Valeh müəllimə ətraflı çatdırılaraq Assosiasiya tərəfindən beynəlxalq kriteriyalara uyğun təkliflər paketi təqdim edildi. Artıq o gündən sonra Dr. Valeh Hüseynovun peşəkarlığı və yüksək səviyyədə idarəetmə bacarığı bizim üçün aydın oldu. 

 

Bir pasiyentin həyat hekayəsini diqqətə çatdıran Ayaz Hüseynov qeyd edir ki, əgər 2-ci qrup əlilliyi olan pasiyentin həyati vacib dərman preparatlarını əldə etmək  üçün Şəmkirdən Bakıya il ərzində 27 dəfə gəlirdisə,  bu da o deməkdir ki,  pasiyent qansızma nəticəsində kəskin ağrılarla 27.000 km qət edirdi. Lakin hazırda pasiyentin lazımi aylıq dərman  dozası regional qan bankına çatdırılır. Bunların hamısına Dr. Valeh Hüseynov beynəlxalq kriteriyalara əsaslanaraq qısa müddətdə nail olmuşdur.

 

2021-ci ilin əvvəllərində Hemofiliyalı Xəstələrin Respublika Assosiasiyası Milli Hematologiya və Trasfuziologiya Mərkəzində qeydiyyatda olan digər laxtalanma pozğunluğundan əziyyət çəkən pasiyentlər və onların valideyinlari arasında monitorinq aparıldı. Monitorinqin nəticəsi onu göstərir ki, məhz 2020-ci ilin  ikinci yarısından etibarən pasiyentlərin özlərində, həkim-xəstə münasibətlərində, Mərkəzin idarəçiliyinin peşəkar səviyyədə qurulmasında və xəstəliklərin müalicəsində yüksək keyfiyyətli xidmətlər tətbiq olunur. Valideynlər bildirirlər ki, əvvəllər istəmədən və məcburən xəstəxanaya gedirdik, çünki hər dəfə ora gedəndə süni süründürməçiliklə üzləşirdik. İndi isə elə deyil, Mərkəzə gedəndə bir inamla, ümidlə gedirik. Aparılan və görülən işlər ümidlərimizi doğrultma yönündədir.

 

Əlbəttə ki, hələ də pasiyentlərin müalicəsinin yaxşılaşdırılmasında görüləcək işlər çoxdur. Təkcə bizim üçün deyil, digər qan xəstəliklərindən əziyyət çəkən vətəndaşların müalicəsində əməli işlər görülür və əminik ki, Dr. Valeh Hüseynov üzə çıxan bütün problemləri tədricən tez bir zamanda həll edəcək və biz Hemofiliyalı Xəstələrin Respublika Assosiasiyası və Pasiyent Təşkilatları İttifaqı olaraq hər zaman dəstəyimizi göstərməyə hazırıq.

 

Qeyd edək ki, 1700 nəfərə qədər hemofiliya və digər qanın laxtalanma pozğunluğundan əziyyət çəkən vətəndaşımız hazırda qeydiyyatdadır. Onlardan 200 nəfərə yaxın Milli Hematologiya və Transfuziologiya Mərkəzinin Elmi Tədqiqat Hematologiya və Transfuziologiya İnstitutunda müalicə alır, 1400-ə yaxın pasiyent isə Mir Qasımov adına Respublika Kliniki Xəstəxanasının Hematologiya şöbəsində qeydiyyatdadırlar.