Çinin Tibbi Məhsullar üzrə Dövlət İdarəsi böcək hüceyrələri əsasında hazırlanan koronavirusa qarşı peyvəndin klinik sınaqlarının başlanmasını təsdiqləyib.

Aztibb.az xəbər verir ki,  bu barədə Çinin nüfuzlu "Global Times" qəzeti məlumat yayıb.

Məlumata əsasən, Siçuan Universitetinin biolaboratoriyasında hazırlanan dərman artıq meymunlar və digər heyvanlar üzərində uğurla təcrübə edilib. Hazırda koronavirus vaksininin insanlar üzərində sınanılmasına icazə verilib.

Universitet mütəxəssisləri bildirirlər ki, peyvənd üzərində iş bir neçə ay ərzində aparılıb. Onlar indiyədək hər hansı kənar təsiri üzə çıxmayan, yüksək keyfiyyətli məhsul yaratdıqlarını iddia edirlər.

Qeyd olunub ki, bu preparat ildə 100 milyon komplekt həcmində istehsal olunacaq.