“2017-2021-ci illər üçün qanın bədxassəli xəstəlikləri ilə mübarizə üzrə Tədbirlər Proqramı”nın müddəti uzadılıb.

Aztibb.az xəbər verir ki, bunu Milli Hematologiya və Transfuziologiya Mərkəzinin icraçı direktoru Valeh Hüseynov deyib.

V.Hüseynov bildirib ki, qanın bədxassəli xəstəlikləri ilə mübarizə mərkəzin daim diqqətdə saxladığı aktual problemlərdən biridir: “Həmin Tədbirlər Proqramının genişləndirilməsi təklif olunub. Proqram nəticəsində, bədxassəli xəstəliklərdən əziyyət çəkən hər kəs, xüsusilə azyaşlılar beynəlxalq protokollar əsasında, Milli Hematologiya və Transfuziologiya Mərkəzində təmənnasız müalicə ala biləcəklər. Bu gün bəzi mövcud problemlərə görə, bir sıra xəstələr ödənişli müalicə olunur. Eyni zamanda, bəzi dərman preparatlarının çatışmazlığı ilə üzləşirik. Lakin nəzərə almaq lazımdır ki, ötən 2 il Azərbaycan üçün istər yeni növ koronavirus infeksiyası (COVID-19) ilə mübarizə, istərsə də Vətən müharibəsi baxımından çətin dönəm idi. İndi isə mövcud olan bütün problemlərin həlli istiqamətində müəyyən işlərin görülməsi intensivləşib. Onu da qeyd edim ki, rəhbər qurumların bu məsələdə mərkəzə dəstəyi böyükdür. Yaxın gələcəkdə qanın bədxassəli xəstəliklərindən əziyyət çəkən pasiyentlər dərman preparatları ilə təmin olunmada problem yaşamayacaqlar”.

Qeyd edək ki, “2017-2021-ci illər üçün qanın bədxassəli xəstəlikləri ilə mübarizə üzrə Tədbirlər Proqramı” Azərbaycan Respublikası Nazirlər Kabinetinin 2016-cı il 11 noyabr tarixli qərarı ilə təsdiq edilib. Tədbirlər Proqramının məqsədi ölkədə qanın bədxassəli xəstəliklərinin diaqnostikasını və müalicəsini müasir səviyyəyə çatdırmaqla, bu xəstəlikdən əlillik və ölüm hallarının azaldılmasından ibarətdir.