Orqan transplantasiyası icbari tibbi sığortanın Xidmətlər Zərfi çərçivəsində təmin olunmur.
Aztibb.az xəbər verir ki, İcbari Tibbi Sığorta üzrə Dövlət Agentliyinin Marketinq və ictimaiyyətlə əlaqələr departamentindən verilən məlumata görə, agentliyin Xidmətlər Zərfində təminata alınmayan tibbi xidmətlərdən istifadə edən şəxs öz maliyyə vəsaiti hesabına ödəniş etməlidir.
Xidmətlər Zərfi ilə təminata alınmayan tibbi xidmətlər aşağıdakılardır: dövlət proqramları çərçivəsində müalicə və müayinəsi nəzərdə tutulan tibbi xidmətlər; kosmetoloji və plastik cərrahi əməliyyatlar; orqan transplantasiyası; ambulator şəraitdə dərman təchizatı; süni mayalanma; psixi və davranış pozuntularının müayinə və müalicələri; stomatoloji xidmətlər.
Xatırladaq ki, Xidmətlər Zərfinə daxil olan tibbi xidmətlər və tariflər Azərbaycan Respublikası Nazirlər Kabinetinin 2020-ci il 10 yanvar tarixli 5 nömrəli Qərarı ilə təsdiq edilib. İcbari tibbi sığortanın Xidmətlər Zərfinə daxil olan tibbi xidmətlərin sayı 2550-dir.
