Aztibb.az xəbər verir ki, simpozium Türkiyə Cümhuriyyətindən dəvət olunmuş mütəxəssislərin təqdimatları ilə işini davam etdirib. Toplantıda həkim Özkan Ufuk Nalbantoğlu “Mikrobiom nədir? Mikrobiom disbalansının yaratdığı problemlər və həlli yolları”, həkim Tarkan Karakan “Qastrointestinal xəstəliklər və mikrobiom arasında əlaqə”, diyetoloq Damla Bəyazgül “Mikrobiom analiz nəticələrin izahı və pasientə individual qidalanma təlimatlarının verilməsi” mövzusunda təqdimatlarla çıxış ediblər.

 

Qeyd olunub ki, mikrobiota - bağırsaqlarımızda yaşayan, sağlam qalmağımız üçün böyük əhəmiyyətə malik mikroorqanizmlər, mikrobiom isə bütün bağırsaq bakteriyalarının genlərinin cəmidir. Son dövrlərdə aparılan tədqiqatlar bağırsaq mikrobiomunun insan sağlamlığında çox əhəmiyyətli rol oynadığını ortaya çıxarıb. Yeni nəsil sekvensləmə texnologiyası (NGS) və süni intellekt texnologiyası vasitəsilə bağırsaq mikrobiomunu gen səviyyəsində öyrənmək və hər bir şəxsə spesifik qidalanma bələdçisi təqdim etmək, eyni zamanda bir sıra bağırsaq xəstəliklərinin diaqnozunu qoymaq mümkündür.