“Koronavirus xəstəliyini keçirmiş donorların hər birinə təşəkkür edirik”.
Aztibb.az xəbər verir ki, bunu Tibbi Ərazi Bölmələrini İdarəetmə Birliyinin (TƏBİB) Xəstəliklərin profilaktikası və kontrolu şöbəsinin müdiri Yaqut Qarayeva Nazirlər Kabineti yanında Operativ Qərargahın brifinqində deyib.
“Bu günə qədər 99 nəfərə yaxın şəxs prosesə qoşulub. 79 nəfər donorumuz bu prosesə uyğun hesab olunub. Onlardan götürülən plazmalar 179 xəstənin müalicəsində istifadə olunub”, - o bildirib.
ATU-nun Tədris-Terapevtik Klinikasının reanimasiya şöbəsinin müdiri Emil Qasımov bildirib ki, immun plazmaların istifadəsində problem olmayıb:
"İmmun plazma hələlik dünyada müzakirə məsələsindədir. Bəzi ölkələr deyir ki, çox efekt ala bilmirik, ancaq Azərbaycanda bizim efekt aldığımız kifayət qədər xəstələrimiz var. Son aylar immun plazmaların istifadəsində heç bir problemlərimiz olmayıb”.
