Ümumdünya Oraq Hüceyrəli Anemiya Günü, oraq hüceyrəli anemiya xəstəliyi və onun müalicəsi haqqında cəmiyyəti məlumatlandırmaq üçün hər il iyun ayının 19-u qeyd olunur.

Aztibb.az xəbər verir ki, oraq hüceyrəli anemiya - qırmızı qan hüceyrələrinin (eritrositlərin) irsi xəstəliyidir. Hemoqlobinopatiyalar (hemoqlobin pozuntuları) qrupuna aiddir, çünki hemoqlobinin beta zəncirində baş verən mutasiyası nəticəsində yaranır.

Xəstəliyin ən sıx rastlanan əlaməti vazo-okklyuziv krizlərdir (damar tıxanma krizləri, tutmaları). Bu zaman kiçik qan damarları oraqvarı eritrositlərlə tıxanır, qan təchizatının pozulması işemik zədələnməyə və ağrılara gətirib çıxarır. Homoziqot Hb S daşıyıcılarının təqribən 50%-i bu cür ağrı tutmaları keçirir. Ağrıların təkrarlanma tezliyi xəstədən xəstəyə çox fərqlidir: bəzilərində ildə 6 və ya çox tutma olur, bəzilərində isə böyük fasilələrlə olur, ya da heç olmur.

Oraq hüceyrəli anemiya erkən uşaqlıqda özünü biruzə verir. İlk 6 aylarında südəmər körpələr hemoqlobin F ilə qorunur, bundan sonra xəstəlik aşkar özünü göstərir.