COVID-19 dünyada həyat sürməyə davam edərkən, epidemiya ilə bağlı araşdırmalar fasiləsiz davam edir. Virusa qarşı müdafiə silahlarını artırmaq üçün xəstəliyin parollarının deşifrə edilməsinə çalışılır.

Aztibb.az xəbər verir ki, ABŞ alimləri tərəfindən 6 ölkədə aparılan araşdırmalar nəticəsində vegeterianların koronavirusa yoluxma ehtimalının ət istehlak edənlərdən 73% daha az olduğu ortaya çıxıb.

Tədqiqat ABŞ-ın Con Hopkins Universitetinin mütəxəssislərinin rəhbərliyi altında ümumilikdə 2884 nəfərin iştirakı ilə aparılıb.

Tədqiqatın nəticələri qabaqcıl tibb dərgisi olan “British Medical Journal”da dərc olunub. Araşdırmaya qatılanların 2300-dən çoxu koronavirusa yoluxmayan, 568-i isə xəstəliyi keçirənlərdən ibarət olub. İştirakçıların 138-də şiddətli simptomlar, 430-da xəstəliyin yüngül əlamətləri müşahidə edilib.  

“Vegeterianlar arasında yoluxma olsa belə xəstəliyin şiddət dərəcəsinin daha aşağı olduğu müəyyənləşdirilib. Onların qidalanma tərzi kütləvi yoluxma halı baş verərsə koronavirusdan müdafiə üçün əhəmiyyətli bir yol ola bilər”, – deyə nəticələri şərh edən ABŞ mütəxəssisləri bildiriblər.