Böyrəkdə və ya sidik kanalının üst və orta qismində olan daşlar həkimin göstərişi və nəzarətində bəzən xaricdən şok dalğalar tətbiq edilən aparatın köməyi ilə qırılaraq müalicə edilir. Bu müalicə üsulu tətbiq edildiyi zaman xəstənin anesteziya (narkoz) almasına ehtiyac olmur. Belə bir müalicə tətbiq edildikdə qırılan daş parçaları yenə xəstə tərəfindən (sidik ifrazi ilə) çıxarılmalıdır. Daş müalicəsində bu üsul artıq 1980-ci ildən aparılır və 80% pasientdə uğurlu olması qeyd olunub.
Aztibb.az xəbər verir ki, bu barədə həkim-nefroloq Barat Yusubov məlumat verib.
O, bildirib ki, bəzən daşın ölçüsü, sərtliyi və yerləşməsi bu şok üsulu ilə aparılan müalicəyə tabe olmur. Belə hallarda daşın əməliyyatxana şəraitində endoskopik üsul hesab olunan işıqlı və kameralı alətlərlə sidik yolundan çıxarılması lazım ola bilər. Adətən belə hallarda daşı olduğu kimi çıxarmaq mümkün olmadığı üçün daş lazerlə kiçik hissələrə bölünüb çıxarılır.
Böyrəyin içində olan böyük ölçülü daşlarda isə kürəkdən təxmini 1 sm böyrəyə açılan bir kanal vasitəsilə daşların çıxarılması üsulu da tətbiq oluna bilər. Bu müalicə üsullarından hansının tətbiq olunacağı həkimin pasienti müayinə etməsindən sonra təyin edilməlidir.