Ölüm riski yüksək olan, bağırsaqların nadir və ağır inkişaf qüsuru ilə 2200 qram çəkidə doğulmuş körpə uşaq cərrahiyyəsi və urologiyası sahəsində uzman həkim Fuad Hüseynovun rəhbərlik etdiyi Mərkəzi Klinikanın həkimlər qrupu tərəfindən əməliyyat olunub. 

 

Aztibb.az xəbər verir ki, bu barədə uzman həkim F.Hüseynov məlumat verib.  Onun sözlərinə görə, bu problemlə doğulan körpələrin 60%-nin yaşama ehtimalı yoxdur.

 

F.Hüseynov bildirib ki, körpənin bağırsaqları anormal yerləşirdi, acı bağırsağın ucu kor bağırsaqda qurtarırdı və geniş idi: "Digər bağırsaqlar bətndaxili işləmədiyi üçün olduqca incə idi və bağırsaqları qidalandıran damarlarda ciddi problem mövcud idi (Tip lll b Christmas tree və ya Apple-peel)".

 

 

Həkim qeyd edib ki, tam sağlam şəkildə evinə yola salınan körpə hazırda 9 aylıqdı və yaşıdlarından geri qalmır.