Əgər övladınızda həddindən artıq aktivlik, düşünmədən hərəkət etmə, istəkləri və duyğularına nəzarət edə bilməmə, söz eşitməmə ya da diqqət problemləri varsa, mütləq uşaq psixiatrına müraciət edin.
Bu barədə uşaq psixoloqu Arzu Adgözəlova sosial şəbəkədə məlumat paylaşıb.
O bildirib ki, əgər müayinədən sonra uşağa diqqət əksikliyi və hiperaktivlik diaqnozu qoyularsa, bunu qəbul etməli və bu barədə maariflənməlisiniz. Çünki valideyn təlimi müalicənin vacib hissəsidir. Övladınıza nə olursa olsun onun yanında olduğunuzu deyin və bunu hiss etdirin. Evdə rutininiz olsun. Bu rutinləri kağıza qeyd edərək uşağın hər gün görməsinə nail olun. Günün axışını qeyd etdikdən sonra xatırlatmaq üçün zəngli saatlardan və ya başqa vasitələrdən istifadə edə bilərsiniz. Valideynlər aşağıda qeyd olunanları da mütləq nəzərə almalıdır.
- “Xüsusi vaxt” təyin etmək. Bu zaman ana, ya da atanın 20-30 dəqiqə müddətində uşaqla birlikdə oyun oynaması nəzərdə tutulur. Bu müddət ərzində uşağa qayğı göstərmək lazımdır. Əyləndirici oyunlar oynamalı və xoş vaxt keçirməlisiniz.
- İstənməyən davranışları gözardı edərək müsbət davranışları tərifləmək və önə çıxarmaq. Bəzən mənfi davranışı görməzdən gəldikdə, uşaq bu davranışı daha da artıra bilər, ancaq bu münasibətinizdə tutarlı olduqda mənfi davranışların azaldığınızı görəcəksiniz.
- Uşağın qarşısına onun bacarmayacağı tələblər qoymaqdan çəkinin. Məsələn, "Mən demədən dərslərini özü etsin, tapşırığı olmasa da hər gün kitab oxusun. Dərslərini sevərək və həvəslə etsin və s."
Uşaqdan nəyisə tələb etdikdə mütləq:
- normal səs tonu seçin
- göz kontaktı qurun
- sözünüzü sual və ya xahiş formasında deməyin
- tələbiniz qısa və konkret olsun.
Psixoloq, həmçinin evdə dəqiq qaydaların müəyyən edilməsinin zəruri olduğunu söyləyib. Qeyd edib ki, uşaq nələr edib, nələr edə bilməyəcəyini anlamalıdır. Zaman-zaman onun müsbət davranışlarını mükafatlandıraraq o davranışların artmasını təmin etmək mümkündür.
