Aztibb.az xəbər verir ki, həkim-reanimatoloq Şahin Məmmədov sosial şəbəkədə bu suala aydınlıq gətirib.

 

Həkimin sözlərinə görə, immun çatışmazlığı olan insan dedikdə kimyaterapiya, şüa terapiyası alan onkoloji xəstələr, ağır şəkərli diabet, QİÇS, anadangəlmə immun çatışmazlığı sindromları, orqan köçürülmüş şəxslər və autoimmun xəstəliklərə görə təyin olunmuş immun supressant dərman qəbul edən xəstələr nəzərdə tutulur:

 

"Onlara vaksin vurulması təhlükəli deyil. Lakin aseptik şəraitdə vurulubsa, digər insanlarda olduğu kimi əlavə təsirlərin görülməsi istisna edilmir.

 

Amma bu qrup xəstələrdə vaksin işə yaramaya bilər. Vaksinin onlarda koronavirusa qarşı immunitet yaratma ehtimalı azdır. Ona görə hətta tam vaksinasiya olunmuş immun çatışmazlıqlı xəstələr bu virusa qarşı özlərini ciddi qorumağa davam etməlidirlər".