Sifilis geniş yayılmış, cinsi yolla ötürülən xəstəlikdir. 2016-cı ildə dünyada 6 milyon yeni sifilis hadisəsi qeydə alınmışdır. Sifilis Treponema pallidum (solğun treponema) adlanan spiroxet formalı bakteriyanın pallidum yarımnövü tərəfindən törədilir.

Aztibb.az Salyan rayon Mərkəzi Xəstəxanasının məlumatına istinadla xəbər verir ki, yoluxma, adətən simptomsuz keçir, lakin bir sıra kliniki formalarda da təzahür edə bilər.

Anogenital nahiyədə ağrısız xora (şankr) ilkin infeksiyanın əlamətidir.

Kliniki müayinə və seroloji testlər, adətən, birbaşa diaqnoz qoymağa imkan verir. Müalicəsi penisillinlə aparılır.

Sifilis müalicə edilmədikdə İİV-in ötürülməsinə şərait yaradır və təhlükəli xəstəliklərə, məsələn, ürək-damar və sinir patologiyalarına, eləcə də, yenidoğulmuşlarda anadangəlmə sindromlara səbəb olur.

Dünyanın müəyyən hissələrində hamiləlik dövründə sifilis spontan uşaqsalma, ölü dölün doğulması, eləcə də perinatal xəstələnmə və ölüm hallarının əsas səbəblərindəndir.

Qazanılmış infeksiya insandan insana sifilisin erkən dövründə (birincili və ya ikincili) olan xəstə ilə cinsi əlaqə yolu ilə birbaşa ötürülür. Cinsi yolla ötürülən sifilis hadisələrinin əksər hissəsi cinsiyyət üzvlərində və ya selikli qişalarda yerləşmiş sifilitik yaralarla birbaşa təmas nəticəsində baş verir. Anadan körpəyə şaquli yoluxma anadangəlmə infeksiya ilə nəticələnir. Sifilisi tez-tez "böyük imitator" adlandırırlar, çünki bir çox simptomları qeyri-spesifikdir və digər xəstəliklərdən fərqləndirilməsi çətindir.