Beylor tibb kollecinin tədqiqatçıları sinirə təsir göstərməklə toxluğa səbəb ola bilən tamamilə yeni sinir zənciri müəyyən ediblər. Həmçinin hiperaktivlik sindromu və diqqət defisitinə qarşı preparatların bu zəncirə təsir etdiyi aşkar olunub.

Aztibb.az meddaily.ru-ya istinadla xəbər verir ki, qeyd olunan zəncir neyronların iki müxtəlif dəstini birləşdirir. Onlardan biri adətən həzz və motivasiya hissi ilə assosiasiya edilən neyromediator dofamin istehsal edir. Siçanlar qidalanan zaman alimlər neyronların bu iki dəstinin fəallığını müşahidə ediblər. Məlum olub ki, dofamin istehsalı üçün cavab verən DA-VTA neyronları gəmiricilər yeməyi dayandırmazdan əvvəl öz fəallığını artırırlar. Sonrakı sınaqlarda alimlər gen səviyyəsində DA-VTA neyronlarının fəallığını ləngidiblər. Nəticədə heyvanlar çox yeməyə başlayıblar.

DA-VTA neyronlarından siqnallar alan DRD1-LPBN neyronlarının ikinci dəsti üzərində aparılmış oxşar sınaqlar göstərib ki, onların fəallığının artırılması doyma reaksiyasına səbəb olur - siçanlar dərhal qidanın qəbulunu dayandırıblar.

Beləliklə, sinir zəncirinin bu iki komponentinə təsir edərək, doyma hissinə səbəb olmaq mümkündür.