Baş ağrılarının müxtəlif səbəbləri var. Həkimlər üçün vacib olan ağrının xarakteri, müddəti, ağrının başın hansı nahiyəsini əhatə etməsi, ağrı zamanı digər nevroloji əlamətlərin olub-olmamasıdır.

Aztibb.az Salyan rayon Mərkəzi Xəstəxanasına istinadla xəbər verir ki, hər baş ağrısının səbəbi beyində şiş olması ilə əlaqələndirilməməlidir. Hər baş ağrısı zamanı KT ya MRT ehtiyac yoxdur. Beyin şişləri zamanı baş ağrısına səbəb olan digər nevroloji əlamətlər, yəni ətraflarda zəiflik, görmədə pozğunluq, ikigörmə, müvazinət pozulması və s. də müşahidə edilir.

Kəskin baş ağrısının səbəblərindən biri beyinin infeksion xəstəlikləri (meningit, ensefalit), baş-beyin travması, qansızma ola bilər. Xroniki baş ağrılarından uşaqlarda daha çox miqren və gərginlik baş ağrılarına rast gəlinir. 

Uşaqlarda miqren böyüklərdən fərqli olaraq başın hər iki tərəfini əhatə edir. Miqren ağrısı zamanı ürəkbulanma ya qusma baş verə bilər, Ağrı orta ağır ya şiddətli olur, ağrı zamanı işıq, səs-küy istənilmir və o, hərəkət etdikcə artır. Miqren tutması uşaqlarda 1 saatdan 3 sutkaya qədər davam edir. Miqren baş ağrısının genetik meyilliliyi var.

Uşaqlarda rast gələn digər ağrı nğvlərindən olan gərginlik baş ağrısı zamanı ağrı orta ağır olur və o, gün ərzində ağrısız dövrlə də müşahidə edilir. Ağrı zamanı ürəkbulanma da ola bilər. Ağrı fiziki aktivliklə artmır.