Son üç ildə 7 mindən çox saxta əlillik pensiyaları dayandırılıb. Bu proses vətəndaşı görmədən, müayinə etmədən həyata keçirilmir.

Bu barədə Xaçmazda media nümayəndələrinə müsahibəsində Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri Cavid Əbdul-Qədirov deyib.

“Hər bir vətəndaş dəvət olunaraq əyani müayinədən keçirilib. Ehtiyac olduğu halda ambulator və stasionar müalicənin epiqrizinə uyğun olaraq laborator və rentgen müayinələri aparılıb. Bundan sonra əlillik meyarlarına uyğun olmayan vətəndaşların əlilliyi dayandırılıb. Hazırda əlillik pensiyaları dayandırılması ilə bağlı həm sosial şəbəkələr üzərindən, həm də digər formada vətəndaşlar tərəfindən çoxlu müraciətlər var. Amma indiki halda heç kimin əlillik pensiyalarının dayandırılması nəzərdə tutulmayıb. Müraciətlərin çoxluğu onunla əlaqədardır ki, bir çox vətəndaşlarda 2015-ci ildə əlilliyin 5 illiyinə uzadılması həyata keçirilib. Bu vaxt bitəndən sonra vətəndaşın əlillik müddəti dayanır. Yenidən forma 88 tərtib olunaraq müraciət olunduqda onun məsələsinə baxılır”, - deyə Cavid Əbdul-Qədirov söyləyib.