Unutqanlıq, yaddaşsızlıq, diqqətin azalması kimi konsentrasiya problemi olan insanlarla tez-tez rastlaşırıq. Problemin səbəbləri isə müxtəlifdir. Stres, depressiya, kompüter və telefondan çox istifadə edilməsi də yaddaş zəifliyi yaradan səbəblərdəndir.

Aztibb.az xəbər verir ki, Bakı Sağlamlıq Mərkəzinin həkim-nevropatoloqu Sevinc Salamova AZƏRTAC-a deyib: “Yaddaş beynin ən mühüm funksiyalarından biridir. Yaddaşın zəifləməsi və azalması demensiya adlanır. Yaddaş zəifliyi ən sadə və ən mürəkkəb səbəblərdən yarana bilər. B12 vitaminin çatışmazlığı, tireoid vəzinin funksiyasının pozulması, hər hansı dərman maddəsinin uzun müddət qəbul edilməsi, müxtəlif zərərli vərdişlərin, məsələn, alkoqol qəbulu yaddaş zəifliyinə aparıb çıxaran başlıca səbəblər sayılır”.

Yaddaş zəifliyinin aradan qaldırılması üçün bəzən tez-tez şirin çay içilməsi və şirniyyat qəbulu tövsiyə edilir. Həkim-nevropatoloqun fikrincə, əslində belə qidaların faydası yoxdur: “Daha yaxşı olardı ki, müxtəlif dəniz məhsulları, meyvə-tərəvəzlər, vitamin və Omeqa yağları ilə zəngin olan məhsullar balanslaşdırılmış şəkildə qəbul edilsin. Beynin daha çox çalışmasına da nail olmaq lazımdır. Çox mütaliə etmək, xarici dil öyrənmək yaddaşı möhkəmləndirən amillərdəndir. Fiziki aktivlik və normal yuxu rejimi də yaddaşa müsbət təsir göstərir”.