Göy öskürək mikroblar tərəfindən törədilən yoluxucu xəstəlikdir. Yenidoğulmuşlar və 1 aylığına qədər olan körpələr üçün göy öskürək daha təhlükəlidir.

Aztibb.az Salyan rayon Mərkəzi Xəstəxanasına istinadla xəbər verir ki, göy öskürək bakteriyaları tənəffüs yollarının selikli qişasının qıcıqlandıran xüsusi toksinlər ifraz edir. Nəticədə diafraqma və bronx əzələllərinin də qatıldığı spastik öskürək yaranır.

Patologiya sadə qrip əlamətləri ilə başlayır (burun axıntısı, yüngül qızdırma, konyuktivit və s). Uşaqda anidən başlayan tutmaşəkilli boğulmalar olur və öskürək krizləri davam edir. Öskürək krizləri əsasən gecələr olur. Öskürək zamanı uşaqda boğulma, göyərmə halları müşahidə olunur.

Südəmər uşaqlarda göy öskürək zamanı baş verən tutmalar tənəffüsün dayanmasına gətirib çıxara bilər.

Göy öskürək, həmçinin öz fəsadları (pnevmoniya (sətəlcəm), kəskin laringit (qırtlağın iltihabı), göbək və qasıq yırtıqları, burun qanaxmaları, tənəffüsün dayanması, nevroloji pozulmalar və s.) ilə də təhlükəli hesab edilir.

Göy öskürəyin köklü bir müalicəsi yoxdur. Əsasən şikayətlərin azaldılmasına yönəlik simptomatik müalicə aparılır.

Peyvənd olunmuş uşaqlar göy öskürəyə tutulsa da, onu daha yüngül keçirir.