Yüngül xəstələrə çox zaman dərman preparatı təyin edilmir. Amma bəzi hallarda tərkibi vitamin və minerallarla zəngin olan polivitaminlərin qəbulu məsləhət görülür. Orta-ağır xəstələrə isə ehtiyac olduğu halda həkim məsləhəti ilə antibiotiklər təyin edilir. Təəssüf ki, son zamanlar testi pozitiv çıxanların əksəriyyətinin ilk gündən müxtəlif qrup antibiotiklərdən istifadə etdiyinin şahidi oluruq:

 

"Bu da təbii ki, xəstəliyin daha da ağırlaşmasına və ölüm hallarının artmasına səbəb olur. Evdə müalicələri davam etdirilən şəxslər gün ərzində bol maye içməli, kifayət qədər vitamin və zülalla zəngin qidalar qəbul etməlidirlər. Daha çox tərəvəz, göyərti, meyvə və giləmeyvəyə üstünlük verilməlidir. COVID-19 xəstəliyinin müalicəsi zamanı xəstələrin ağırlıq dərəcəsi mütləq nəzərə alınmalıdır.

 

Koronavirus xəstələrinə efir yağları ilə zəngin olan meyvələr, həmçinin kəskin ədviyyatlar, hisə verilmiş və duzlu qidaların verilməsi məhdudlaşdırılmalıdır. Qidalanma rejiminə düzgün əməl olunarsa, xəstəliklə mübarizə aparmaq daha asan olacaq. Orta hesabla müalicə müddəti 2 həftədir, lakin ağırlaşmış xəstələrdə proses uzana bilər".