İndiana və Vaşinqton universitetləri, eləcə də "Zərərli maddələrsiz gələcək" qeyri-kommersiya təşkilatının yeni tədqiqatı göstərib ki, amerikalı qadınlardan toplanmış ana südü nümunələrinin 100%-də zəhərli kimyəvi maddələr mövcuddur.

Aztibb.az meddaily.ru-ya istinadən xəbər verir ki, 50 nümunə üzərində tədqiqatlar aparılıb. Ekspertlər bu nümunələrdə ətraf-mühitdə parçalanmayan, anadangəlmə qüsurlar və xərçəng daxil olmaqla bir sıra sağlamlıq problemləri ilə əlaqələndirilən PFAS (per- və polifloroalkil maddələr) süni maddələrini tapıblar.

PFAS kosmetikadan, su keçirməyən geyimə və yağı kənarlaşdıran vasitələrə qədər bir çox məhsulda mövcuddur.

Bəzi hallarda ana südündəki birləşmələrin səviyyələri ABŞ-da içməli su üçün təyin edilmiş təhlükəsiz göstəricilərdən 2000 dəfə yüksək olub. Alimlərin sözlərinə görə, ana südünün çirklənməsi, ehtimal ki, genişmiqyaslı xarakterə malikdir.

Ekspertlər PFAS qrupundan olan doqquz qısa zəncirli və 30 uzun zəncirli birləşməni 11 ananın südündə yoxlayıblar. Qısa zəncirli birləşmələr orqanizmdə bir neçə gün və ya ay ərzində qala bilən uzun zəncirli analoqları ilə müqayisədə, daha az təhlükəli hesab edilir.

Ana südündə ümumilikdə 16 təhlükəli birləşmə aşkar edilib. Onlardan bəziləri 4% nümunələrdə, bəziləri isə 100% nümunələrdə tapılıb.