Oksford Universiteti əvvəllər koronavirusa yoluxub sağalan bir qrup insan üzərində tədqiqat məqsədilə klinik sınaq keçirəcək. Buna görə, koronavirus keçirənlərin ikinci dəfə virusa yoluxmasından sonra bədənin immunitet sisteminin verdiyi reaksiyalar öyrəniləcək.

Aztibb.az xəbər verir ki, insanlar üzərində klinik sınaq tətbiq etməklə tibbi araşdırma həyata keçirmək üçün Oksford Universiteti etik normaları nəzərə alaraq, xüsusi icazə də əldə edib.

"Bu araşdırmanın məqsədi infeksiyanın qarşısını almaq üçün immunitetin nə kimi reaksiyalar verəcəyini tədqiq etməkdir. Klinik sınaqda iştirak edəcək şəxslərin isə növbəti həftələrdə müəyyənləşdirilməsi gözlənilir”, – deyə Oksford yetkilisi professor Helen Makşeyn açıqlamasında bildirib.

Oksford tədqiqat qrupu sınaq zamanı T hüceyrələri və antikorlar daxil olmaqla insanlarda immunitet reaksiyasının müxtəlif komponentlərinin səviyyələrini ölçəcək və daha sonra həmin insanların virusa məruz qaldıqda yenidən infeksiyaya yoluxub-yoluxmadığını izləyəcəklər.

Açıqlamada tibbi sınağa cəlb ediləcək insanların isə üç ay öncə koronavirus xəstəliyi keçirən, 18-30 yaş arası sağlam biriləri olması qeyd olunur.

Bundan əlavə, sınağa cəlb edilənlərin əvvəllər bir infeksiya keçirib keçirmədiyini və virusa qarşı immunitetli olub olmadığını müəyyənləşdirmək məqsədilə aparılan antikor testlərindən keçən şəxslər olması vurğulanır.