TÜBİTAK rəsmiləri COVID-19-a qarşı yüksək effektivliyə malik, virus mutasiyalarına qarşı yenilənə bilən peyvəndi hazırladıqları barədə açıqlama verib.

TÜBİTAK Mərmərə Araşdırma Mərkəzi, Gen Mühəndisliyi və Biotexnologiya İnstitutu tərəfindən COVID-19-a qarşı peyvənd və dərman hazırlanmsı istiqamətindəki təməl araşdırmalarda böyük müvəffəqiyyətin əldə olunduğu bildirilib.

“Türkiyədə insan peyvəndinin istehsalına 1990-cı illərin ikinci yarısından etibarən başlanılıb. Necə ki, Türkiyə əvvələr müdafiə sənayesində idxalçı ölkə idi, hazırda  isə bu sahədə böyük bir payı var, eləcə də biz ölkəmizin gələcəkdə peyvənd və dərman istehsalında da potensialı olduğuna inanırıq. Bu güvəncin ən böyük təminatçıları isə türk alimləridir”, – deyə rəsmilər vurğulayıb.

Gen Mühəndisliyi və Biotexnologiya İnstitutu Türkiyədə koordinasiyaedici qurumdur

Türkiyədə pandemiya başlayan ərəfədə 49 fərqli təşkilat və 436 tədqiqatçı Sənaye və Texnologiya Nazirliyinin koordinasiyası ilə peyvənd və dərmanların effektivliyinin artırılması məqsədilə bu sahədə fəaliyyət üçün yeni bir platforma yaradır. 

Tədqiqatçıların və gənc tələbələrin səfərbər olaraq, gecə-gündüz yüksək inam ruhunda çalışdıqlarını bildirən TÜBİTAK rəsmisi, ümumilikdə 43 layihə üzərində tədqiqatın aparıldığını söyləyib: “Bunlardan 7-si peyvənd, 10-u dərman istehsalı və müalicə metodlarının işlənilməsi üzrə layihədir. 7 peyvənd layihəsinin hər biri fərqli peyvənd növü əldə etmək üçün həyata keçirilməkdədir. 6 peyvənd növü biotexnoloji peyvənddir və heç bir xarici peyvəndlə eyni deyil. Odur ki, alimlərimizin üzərində çalışdığı yüksək effektivli peyvəndlər gələcəyə hesablanmış investisiyadır”.

Rəsmilər, həmçinin TÜBİTAK-ın alman biotexnoloji firması olan “BioNTech”lə birgə peyvən istehsalı sahəsində gözləntilərinin olduğunu və bununla əlaqədar mərkəzin 2022-ci ilin sonunadək qurulacağının nəzərdə tutulduğunu bildiriblər.