Böyrək daşları olanlar çərəz, ispanaq, və kakao istifadəsini azaltmalıdır. Oksalat maddəsi, demək olar ki, hər qidanın tərkibində var, lakin bəzi qidalarda daha çoxdur. Buna görə də böyrək daşı olanlar çərəz, çay, qəhvə, ispanaq, kakao, çiyələk kimi qidaların qəbulunda diqqətli olmaq, daha az istifadə etməyə lazımdır.

 

Aztibb.az xəbər verir ki, bu barədə həkim-nefroloq Barat Yusubov sosial şəbəkədə paylaşım edib. 

 

Həkim bildirib ki, heyvan mənşəli protein (hər hansı ət və ya ət məhsulu), kalsium, xüsusilə də pomidorda olan oksalat maddəsi böyrəklərin fəaliyyətinə mənfi təsir göstərir: "Böyrək daşı olanlar protein qəbuluna diqqət etməlidirlər. Bir yemək qəbulu zamanı heyvan mənşəli protein qəbul edirsinizsə digər yemək qəbulu zamanı lifli qidalara üstünlük verin, əgər səhər çox miqdarda pendir yeyirsinizsə, günorta ət xörəyi yeməyin".

 

B.Yusubov böyrəkləri su ilə bəsləməyin əhəmiyyətindən danışaraq bildirib ki, sidik vasitəsi ilə orta hesabla 50 maddə süzülərək orqanizmdən xaric edilir.

 

"Kifayət qədər su içildikdə sidiyin miqdarı artır və bu da maddələr mübadiləsinə və süzülmə prosesinə yaxşı təsir edir. Beləliklə, böyrəklərdə kristallaşma azalır, mövcud olan kiçik kristallar orqanizmdən ifraz olunur. Az su içildiyində isə süzülmə miqdarı azalır və daş əmələ gəlməsinə səbəb olan kalsium, oksalat və oxşar maddələr kristallaşmağa başlayır, zaman keçdikcə daşa çevrilir. Böyrəklərinizdə daş əmələ gəlməməsi üçün gündəlik olaraq 2 litrə yaxın su qəbul edin. Amma hər bir insan gündəlik su içərkən sidiyə çıxmağını nəzarətdə saxlamalıdır. Əgər siz 2 litr su içib, gündəlik o suyun bədəndən xaric olunmadığını, şişkinlik yaratdığı hiss edirsinizsə, su miqdarını azaltmalı və həkimə müraciət etməlisiniz. Normal su qəbulu və ifrazatı zamanı sidik iysiz və rəngsiz olmalıdır", - deyə həkim vurğulayıb.