Körpələrdə bez göbək düşənə kimi göbəyin üstünü örtməmək şərtilə bağlanmalıdır. Bezin yapışqan bölgəsi yenidoğulmuşun dərisinə toxunmamalı, dərini qıcıqlandırmamalıdır.

Aztibb.az xəbər verir ki, bunu sosial şəbəkədə uşaqlarda bezlərin düzgün bağlanma qaydası haqqında məlumat verən tanınmış həkim-pediatr Günay Rəsulova deyib. 

Həkimin sözlərinə görə, bezin təmas etdiyi bölgələrdə davamlı qızarıqlıq olursa, bu, bezin körpəyə uyğun olmadığının göstəricisidir. Belə halda tərkibində kimyəvi maddələr, ətirləndiricilər olmayan bezlərə üstünlük verilməlidir:

"Bez bölgəsinin səpkisiz, bezin rahat olması uşağın yeməyinə, yuxusuna, ümumi əhval-ruhiyyəsinə ciddi təsir edir. Bezin hər yaşa uyğun ölçüdə taxılması da uşağın rahatlığını təmin edir. Körpələrdə bəzən bud-çanaq oynağı problemlərində üst-üstə iki bez taxılması tövsiyə olunur ki, bu da tamamilə effektsiz, tibbi təsdiqini tapmamış metoddur. Bu, uşağa əziyyət verməkdən başqa bir işə yaramır".