Əczaçılıq nəhəngləri hesab olunan "AstraZeneca" və "Merck" şirkətləri "Lynparza" adlı dərmanın mədəaltı vəzi xərçənginin müalicəsində istifadəsinə icazə alıb.

Aztibb.az xarici mətbuata istinadən xəbər verir ki, bu preparat əvvəllər ABŞ-da və bir sıra digər ölkələrdə xərçəngin müalicəsində istifadə edilib.

154 xəstənin iştirakı ilə keçirilən araşdırma nəticəsində qeyd olunan dərmanın istifadəsinə razılıq verilib.

Xəstələrin bir qisminə gündə 2 dəfə, 300 mq olmaqla "Lynparza" verilib.

Məlum olub ki, bu preparatdan istifadə edənlərin xəstəlik irəliləmədən yaşadıqları müddət iki dəfə artıb. Belə ki, "Lynparza" istifadə etməyənlər 3,8 ay, istifadə edənlər isə 7,4 ay xəstəlik olmadan yaşayıb.

"Merck" Araşdırma Laboratoriyalarının direktoru Roy Baynes bildirib ki, "Lynparza" mədəaltı vəzi xərçənginin müalicəsində təsdiqlənmiş yeganə PARP inhibitorudur.

Qeyd edək ki, Avropa Komissiyası ötən il "Lynparza"nı yumurtalıq və ya süd vəzisi xərçəngindən əziyyət çəkən qadınların müalicəsi üçün təsdiqləyib.