Hazırda COVID-19-a qarşı peyvəndin vurdurulub-vurdurulmamasına dair cəmiyyətdə çoxlu müzakirələr aparılır. Bəziləri vaksinin tərkibinin bəlli olmadığını əsas gətirərək peyvəndləmədən imtina edir. Maraqlısı odur ki, insanlar çox vaxt tərkibi bilinməyən dərmanları asanlıqla vurdurublar, amma nədənsə bu təhlükəli virusdan qorunmaq istəmirlər.

 

Aztibb.az xəbər verir ki, bu haqda Azərbaycanın baş stomatoloqu, Azərbaycan Tibb Universitetinin Ortopedik stomatologiya kafedrasının müdiri, professor Nazim Pənahov açıqlamasında bildirib.

 

N.Pənahov qeyd edib ki, hər kəs dəfələrlə stomatoloji müalicə üçün həkimlərə üz tutub: “Müraciət etdiyiniz klinikada ağız boşluğunda aparılan istənilən müdaxilə (məsələn, plomblama, dişin pulpasının çıxarılması, yaxud dişin özünün çəkilməsi, diş əti xəstəliklərinin müalicəsi, dental implantasiya, müxtəlif protezlərin hazırlanması və s.) zamanı həkim-stomatoloqunuz çox hallarda müxtəlif tərkibli medikamentoz vasitələri ya inyeksiya, ya məhlul şəklində tətbiq edib. Təbii ki, tətbiq edilən medikamentoz preparatların kimyəvi tərkibi, onun hansı üsulla hazırlanması, niyə məhz müalicənin bu və ya digər mərhələsində sizdə istifadə olunması insanları heç maraqlandırmayıb. Lakin COVID-19 qlobal bəlasından qorunmaq üçün dövlətin ayırdığı külli miqdarda valyutanın xərclənməsi hesabına, min bir əziyyətlə respublikamıza gətirilməsi təmin edilən bu vaksinə gəldikdə isə hamı özünü həkim, epidemioloq, əczaçı, mikrobioloq, yaxud kimyaçı kimi aparır. Əksəriyyət Google-dan əldə etdiyi məhdud və tibbi əsası olmayan məlumatlara əsaslanaraq, bir-birlərinə peyvənd vurdurmamaq barədə ciddi tövsiyələr verir”.

 

Bu cür davranışı təzadlı sayan baş stomatoloq bildirib ki, əksər uşaqlara həyatının elə ilk günlərindən Ümumdünya Səhiyyə Təşkilatının tövsiyələrinə əsasən, COVID-19-dan dəfələrlə qorxulu olan infeksiyalardan qorunmaq üçün müəyyən ardıcıllıqla peyvəndlər vurulur: “Bunun bəhrəsini isə biz həyatımız boyunca həmin xəstəliklərə yoluxmamaqda görürük. Yaxud, peşəmizlə əlaqədar olan bəzi infeksiyalar, məsələn, B hepatitinə qarşı əhali arasında kütləvi surətdə peyvəndləmə aparılmasa da, əksər stomatoloqlar könüllü surətdə bu peyvəndi vurdurur, sonra revaksinasiya olunurlar. Onlar belə xəstələrlə təmas zamanı özlərini və yaxın çevrəsini yoluxmaqdan sığortalayırlar. Ancaq demək olar ki, pandemiya başlanan gündən bəzi sosial şəbəkələrdə yayılan, yoxlanılmayan və elmi dəlillərə əsaslanmayan məlumatlara istinad edərək, bəzi həmvətənlərimiz yenə də cari vaksinasiyaya inamsızlıq göstərirlər”.

 

Həkim-stomatoloq hazırki pandemiya dönəmində ətrafdakılardan utanıb-çəkinmədən yerə tüpürən vətəndaşlara da müraciət edib. Qeyd edib ki, koronavirus bəlasından qurtulmağın yeganə yolu vaksinasiya, tibbi maska, sosial məsafə və fərdi gigiyena qaydalarına ciddi riayət etməkdən keçir. Təəssüf ki, bəzi vətəndaşlarımızda ətraf üçün iyrənc gələn, indiki zamanda çox qorxulu olan pis bir adət var. Bu da insanların öskürən zaman ağız boşluğuna düşən bəlğəmi birbaşa küçəyə tüpürməsidir. Tüpürcəyin tərkibindəki külli miqdarda patogen mikroorqanizmlərin və virusların hava vasitəsilə yayılmasına, eləcə də həmin ərazidən keçən insanların ayaqqabılarına bulaşaraq evinə və ya işlədiyi müəssisəyə gətirilməsinə zəmin yaradır.

 

Professor N.Pənahov bir daha vətəndaşlara müraciət edərək, onları elementar gigiyenik qaydalara riayət etməyə və peyvəndə icazə verməyə çağırıb.