Həyat fəaliyyətinin davamlı məhdudiyyətlərinin formalaşmasının ən sıx rast gəlinən səbəblərindən biri sinir sisteminin zədələnməsidir. Təəssüf ki, uşaqlarda da sinir sisteminin zədələnməsi kifayət qədər geniş yayılıb, bu isə uşaqlarda həyati vacib funksiyaların (anlama, qavrama, böyük hərəkətlər, incə hərəkərlər, nitq, özünəxidmət və s.) formalaşmasına ciddi maneə olur. Belə vəziyyətlərdə uzunmüddətli effektiv abilitasiya (olmayan funksiyaların yaradılması) və reabilitasiya (itirilmiş funksiyaların bərpası) üsulları, uşaqların həyata uyğunlaşması tələb olunur. İstər abilitasiya, istərsə də reabilitasiyanın məqsədi uşaqların cəmiyyətə inteqrasiyasıdır.

 

Aztibb.az xəbər verir ki, bu barədə Uşaq Bərpa Müalicə Mərkəzindən məlumat verilib. Uğurlu abilitasiya və reabilitasiyanı həyata keçirmək üçün Uşaq Bərpa Müalicə Mərkəzində əsas prinsiplərə riayət olunur:

 

- erkən müdaxilə;

- hərtərəfli yanaşma;

- mərhələlik;

- davamlılıq;

- ardıcıllıq;

- fərdi yanaşma;

- reabilitasiya prosesində uşaq və valideynlərin aktiv iştirakı.

 

Abilitasiya və reabilitasiyaya ehtiyac duyulan sinir sistemi xəstəlikləri aşağıdakılardır:

 

- Uşaq serebral iflici və digər paralitik sindromlar;

- Sinir sisteminin iltihabi xəstəliklərindən (meningit, ensefalit və s.) sonrakı vəziyyətlər;

- Doğuş travmasından sonrakı vəziyyətlər;

- Doğuş zamanı bazu kələfinin zədələnməsi (pleksitlər);

- Mərkəzi və periferik sinir sisteminin travmalarından sonrakı vəziyyətlər;

- Mərkəzi sinir sisteminin digər üzvü zədələnmələri;

- Sinir sisteminin irsi xəstəlikləri (miopatiya, amiotrofiya və s.);

- Mərkəzi sinir sisteminin anadangəlmə anomaliyaları (Arnold-Kiari, Spina bifida, Dendi-Uoker və s.).