Uşaqların qida seçiminə hörmət edərək onlara sevdiyi yeməyi, lazımi miqdarda vermək lazımdır. “Yemək” deyə-deyə uşaqların arxasınca gəzmək sizin yorulmanızdan başqa bir nəticə verməyəcək.

Aztibb.az xəbər verir ki, bunu tanınmış həkim-pediatr Günay Rəsulova deyib. 

Həkim bildirib ki, əgər uşaqda israrla yeməkdən imtina etmə kimi bir hal varsa, bunun somatik problemdən qaynaqlana biləcəyini unutmamaq, zamanında həkim müayinəsindən keçirmək lazımdır:

“İştahaçıcı adı ilə uşaqlara polivitaminlər vermək isə çox zaman işə yaramır. Araşdırmalarda belə vasitə kimi sadəcə Zn (Sink) özünü doğruldub. Digərləri sadəcə sizin psixoloji rahatlamanıza səbəb ola bilər.

Uşaqlarda səhər yeməyindən imtina isə sadəcə günlük rejimin düzgün qurulmaması ilə əlaqədardır. Gec yatan və bununla bağlı gec yuxudan oyanan uşaqlar çox vaxt səhər yeməyinin vaxtını ötürmüş olur. Belə olmaması üçün uşaqları yuxudan erkən oyatmalı, səhər yeməyinə qədər acmaları üçün ən az 1 saat gözləməlisiniz”.