Çuğundur suyu qan təzyiqinə təsir edir.

Aztibb.az medikforum.ru saytına istinadla xəbər verir ki, Rusiyalı həkim-mütəxəssis Natalya Denisova çuğundur suyunun həqiqətən antihipertenziv xüsusiyyətlərə malik olduğunu söyləyib. Qeyd edib ki, bu faktı təsdiqləyən elmi araşdırma 2008-ci ildə aparılıb. Alimlər çiy və qaynadılmış çuğundurdan hazırlanan suyun təsirlərini müqayisə ediblər. Çiy kök bitkilərinin suyunun daha güclü təsirə malik olduğu aşkar edilib.

Araşdırmanın nəticələrindən danışan Denisova qeyd edib ki, gün ərzində bir stəkan (250 ml) çuğundur suyu içmək prehipertenziyalı xəstələrdə qan təzyiqini aşağı salır.

Həkim izah edib ki, çuğundur suyunun qeyd olunan effekti onun tərkibindəki betain və betaninlərin orqanizmə təsiri ilə əlaqəlidir. Bu maddələr antioksidantlar qrupuna aid olmaqla yanaşı, həm də güclü bir antiinflamatuar təsirə malikdirlər. Həmin xüsusiyyətinə görə çuğundur suyu və çuğundurun özünü istehlak edən insanların qan damarları daha elastik olur və bu da aterosklerozun onlara təsir etmə ehtimalını azaldır.

Həkim çuğundur suyunun qan təzyiqinin normallaşmasına kömək etmə qabiliyyətini ilk növbədə profilaktika ilə əlaqələndirib. Həmçinin qeyd edib ki, əgər insanda təzyiq problemi varsa, çuğundurdan dərman vasitəsi kimi istifadə edərək özbaşına müalicə aparmaq tövsiyə olunmur. Hipertansiyonun müalicə planı və onunla mübarizə vasitələri yalnız həkim tərəfindən təyin olunmalıdır.