Aztibb.az tibbi mənbələrə istinadla xəbər verir ki, zəncirotunun ən bilinən xüsusiyyətlərindən biri də qaraciyərə təsiridir. Bitki qanı təmizləməyə kömək edir və qaraciyəri mikroblardan, toksinlərdən təmizləyir. İmmuniteti gücləndirən və öd kisəsi xəstəliyinin müalicəsində istifadə olunan bu dərman bitkisindən hər kəs faydalana bilər.

 

Zəncirotu həzm sistemini aktivləşdirir və həzmi asanlaşdırır, mədə narahatlığını aradan qaldırır, iştahı artırır. Revmatizm səbəbindən yaranan sümük ağrısını azaldır. Revmatizm üçün müntəzəm olaraq istifadə edildikdə sümüklərin hərəkəti rahatlanır və ağrı kəsilir.

 

Sözügedən bitkinin çiçək və yarpaqları yazda yığılır, kökləri payızda kölgədə qurudulur.  Bitkinin çayından faydalanmaq üçün bir çay qaşığı incə doğranmış zəncirotunu gecə bir stəkan suda islatmaq, səhər oyandıqda bir neçə dəqiqə qaynatmaq, sonra isə dəmləmək lazımdır. Dəmdən götürdükdən sonra süzüb səhər yeməyindən əvvəl və sonra içmək məsləhətdir.

 

Araşdırmalar sübut edib ki, zəncirotu qan şəkərini də tənzimləyir, insulin istehsalını tarazlayır. Lakin diabetli xəstələr yalnız həkim nəzarəti ilə istifadə etməlidirlər. Diüretik (sidikqovucu) dərmanlarla istifadəsi sağlamlığa ciddi təsir göstərə bilər.

 

Zəncirotunun çiçək hissəsindən alınan süd dəri sağlamlığı üçün çox təsirlidir. Göbələk, ekzema və qaşınma kimi problemlər üçün istifadə etməklə daha yaxşı nəticələr almaq mümkündür. Bitki sızanaq üçün də müalicə mənbəyidir. Bu məqsədlə təzə budağı iki yerə bölüb ondan çıxan südü krem şəklində dəriyə çəkmək olar. Allergiya varsa, diqqətli olmaq faydalıdır.