Ödün tərkibində xolesterin və bir çox digər duzlar mövcuddur. Bu maddələr arasında tarazlığın pozulması isə öd daşı xəstəliyinin yaranmasına səbəb olur. 

 

Öd daşı xəstəliyində qidalanmadan sonra qarında, xüsusən də sağ qabırğaaltı nahiyyədə ağrılar, bu ağrıların bel, sağ çiyin, sağ kürək sümüyünün alt hissəsinə yayılması, yanaşı olaraq şişkinlik, qaz, ürəkbulanma kimi şikayətlər müşahidə olunur. Bundan başqa, orta yaşlı, artıq çəkili insanlarda anamnezdə gizli şəkər, xolesterin, qaraciyər piylənməsi, yüksək təzyiqlə bağlı məlumat varsa, öd daşı xəstəliyinin olma ehtimalı daha da artır.

 

Aztibb.az bu barədə Salyan rayon Mərkəzi Xəstəxanasına istinadla məlumat verir. 

 

Öd daşlarının yaranma səbəbləri:

 

● Bəzi qan xəstəlikləri;

● Ödün qatılaşması;

● Öd yolunun tıxanması;

● Qanda bəzi maddələrin həddən artıq yüksəlməsi.

 

Qadınlarda (xüsusən ağ dərili, sarışın, artıq çəkili, çox doğum etmiş) öd daşının yaranma risk daha da artır. Ailə anamnezi də xüsusi faktorlardan hesab olunur.

 

Qidaların və içkilərin bilavasitə daşın əmələ gəlməsində rolu sübut olunmayıb. Ancaq artıq öd daşı varsa, bəzi qidalar (xüsusən yumurta, yağlı qidalar, alkoqol) öd daşının ağrı verməsinə səbəb ola bilər.

 

 

Mədəyə, sinəyə, kürəyə (kürək sümüklərinin arasına) yayılan şiddətli ağrılar, şişkinlik, gəyirmə, ürəkbulanma kimi şikayətlər ola bilər. Ancaq bu şikayətlər əsasında diaqnoz təyin etmək doğru deyil. Bu şikayətlər həm də ürək-damar xəstəlikləri, qastrit, kolit, pankreatit kimi bir çox xəstəliklər zamanı da rast gəlinir.

 

 

Ultrasəs müayinəsi vasitəsilə xəstələrin 98%-də diaqnozu təyin etmək mümkündür.

 

Müalicəsi cərrahidir. Qapalı üsul ilə (laparoskopik) əməliyyat olunmuş xəstələr əməliyyatdan 2-3 gün sonra işinə geri qayıda bilir.