Bəzən uşaqlarda həyəcanlı cizgi filmləri, telefon oyunlarından sonra sinir sisteminin funksional pozğunluqları, qorxu, təşviş, tez-tez nəfəz çatışmazlığı müşahidə olunur. Eyni zamanda göz, ağız-burun tikləri, mədə-bağırsaq narahatlıqları, qəbizlik, yaxud ishala da rast gəlinir.

Aztibb.az xəbər verir ki, bunu tanınmış həkim-pediatr Günay Rəsulova deyib. 

Bundan əlavə, davamlı texnoloji yüklənmə yaşayan uşaqlarda baş ağrısı, yorğunluq, əsəbilik, iştah pozğunluqları (artma və ya azalma) kimi hallara tez-tez rast gəlirik:

“Bu hallar biz pediatrları çox narahat edir. Çünki sürətlə böyüyən uşaq orqanizmi üçün texnoloji stresin gələcək fəsadları qaçılmazdır. Nə qədər çətin olsa da, uşaqlarımızı texnologiyadan uzaq tutaq. Bunun üçün ən qızıl qayda isə odur ki, ilk növbədə özümüz bu vasitələrdən maksimum uzaq durmalı, daha çox kitab oxumalı, uşaqlarla açıq havada gəzməli, aktiv oyunlar oynamalıyıq”.