Hər il olduğu kimi, bu il də aprelin 28-də Azərbaycan Tibb Universitetində (ATU) məşhur oftalmoloq, akademik Zərifə Əliyevanın doğum gününə həsr olunmuş humanitar xeyriyyə aksiyasına start verilib. 

 

Aztibb.az xəbər verir ki, ATU-nun rektoru, professor Gəray Gəraybəyli və ATU-nun Tədris Cərrahiyyə Klinikasının Oftalmologiya şöbəsinin müdiri Qurban İsmayılovun təşəbbüsü ilə universitetdə təhsil alan tələbələr pulsuz göz əməliyyatı olunublar.

 

Oftalmoloq-həkim Qurban İsmayılov qeyd edib ki, bu gün artıq 8 tələbə "Excimer" lazer göz əməliyyatı olunub: “Onlar aztəminatlı ailənin övladlarıdır. Bu tələbələrin laborator müayinələrindən tutmuş bütün əməliyyat xərclərinə kimi, lazım olan hər bir şey universitet rəhbərliyinin təşəbbüsü ilə ödənilib. Əməliyyat zamanı gənclərin gözündə yüksək dərəcəli miyoplar aradan qaldırılıb və əməliyyat tam fəsadsız başa çatıb”.

 

Aksiya 3 gün davam edəcək və bu müddətdə ümumilikdə 34 tələbənin əməliyyat olunması planlaşdırılır.

 

Qeyd edək ki, ATU rəhbərliyinin təşəbbüsü ilə hər il mayın 10-da – ümummilli lider Heydər Əliyevin anadan olmasının ildönümü ərəfəsində də tələbələr üçün bu kimi aksiyalar təşkil olunur.