Pensilvaniya Universiteti xərçəng və qidalanma arasında əlaqəyə dair 17 tədqiqatın analizinin nəticələrinə əsasən müəyyən edib ki, onkoloji xəstəliklər riskini azalmaq baxımından göbələklər xüsusilə faydalıdır.

Aztibb.az meddaily.ru-ya istinadla xəbər verir ki, tədqiqat çərçivəsində 19500-dən çox insanın məlumatları nəzərə alınıb. Məlum olub ki, gündəlik rasionuna göbələklərin istənilən növlərini daxil edən insanlarda xərçəngin inkişafı riski azalır.

Alimlərin sözlərinə görə, gündə 18 qram göbələk istehlakı rasionda göbələklərdən tamamilə istifadə etməyənlərlə müqayisədə, xərçəng riskini 45% aşağı salıb. Göbələklərin müsbət nəticəsi xüsusilə süd vəzi xərçəngi riskində özünü göstərib. Məlumdur ki, göbələklər vitaminlər, mikroelementlər və qidalandırıcı maddələrlə zəngindir.

Göbələklərdə bol miqdarda erqotionein mövcuddur. Bu, güclü antioksidant xüsusiyyətlərə malik, yüksək temperatura davamlı, suda həll olunan aminturşudur. Məhz bu xüsusiyyətlərə görə göbələklərin xərçəng əleyhinə effektini izah etmək olar.