O, bildirib ki, Azərbaycanın bir-birindən dadlı və faydalı şərbətləri vardır. Bunlardan biri də ovşala şərbətidir. Ovşala şərbəti Azərbaycanın dilbər guşələrindən biri olan Şəki mətbəxinə aiddir. Əgər qanuni qaydası ilə hazırlansa, çox faydalı bir şərbətdir. Şərbət ürək zəifliyi olanlar, eləcə də köpdən əziyyət çəkən insanlara məsləhət görülür. Əgər yağlı yemək yeyəcəksinizsə, üzərindən ovşala şərbətini içmək yeməyin rahat həzm olunmasına səbəb olur.

 

 

Təxminən 100 qram qurudulmuş, ətirli qızılgül ləçəklərini 3 stəkan qaynar suya qarışdırıb hamısını birlikdə termosa tökün (və ya 20 dəqiqə vam odda qaynadın), termosda 12 saat qaldıqdan sonra süzüb üzərinə zövqə görə şəkər tozu (təxminən 1 stəkan) və ya ilıq vəziyyətdə olanda bal qarışdıra bilərsiniz. Sonra üzərinə 100 qram boymadərən arağı (bu bildiyimiz araq deyil, boymadərən bitkisi dəmlənilir, sonra qaynadılır, buxarı soyuq suda kondensasiya edilərək toplanılır) qarışdırıb, sonra isə üzərinə 2-3 ədəd limon şirəsi sıxılıb soyuducuya qoyulur. Şərbəti soyuduqdan sonra içmək tövsiyə olunur.