Yazın gəlişi ilə mövsümi xəstəlik olan bahar konyunktivitinə tez-tez rast gəlirik. İnsanlar bu xəstəliyi günəşə qarşı allergiya kimi qiymətləndirirlər. Xəstəliyin patogenezində endokrin sisteminun rolu qeyd edilir və bu, xəstəliyin əksər hallarda həddi-büluğ dövründə başlaması ilə izah edilir.

 

Aztibb.az xəbər verir ki, bu fikirləri N.Tusi adına Klinikanın həkim-oftalmoloqu Aytən Mirzəyeva bildirib. 

 

O, qeyd edib ki, ultrabənövşəyi şüalar xəstəliyin kəskinləşməsində mühüm rol oynayır.

 

"Bahar konyunktiviti zamanı əsas şikayətlər gözdən yaşaxma, gicişmə və gözqırpmadır. Xəstəlik 3 formada keçir. Qapaq forması zamanı dəyişiklik yalnız göz qapağının konyunktivasında müşahidə olunur. Limbal forma zamanı dəyişiklik yalnız limb ətrafinda olur. Xəstəliyin, həmçinin qarışıq forması da mövcuddur", - deyə A.Mirzəyeva vurğulayıb. 

  

Həkimin sözlərinə görə, bu xəstəlik yaz-yay aylarında kəskinləşərək uzun illər davam edir və iz buraxmadan sağalır. Müalicəsi yerli və ümumi aparılır. Ultrabənövşəyi şüalardan qorunmaq üçün gün eynəyindən istifadə etmək tövsiyə olunur.