Azərbaycan Onkoloqlar Cəmiyyətinə kim üzv ola bilər?/Qeydiyyat qaydaları

23.04.2021 12:22

Azərbaycan Onkoloqlar Cəmiyyəti (AOC) onkologiya və digər tibb sahələri üzrə elmi-tədqiqat və praktiki işlərdə çalışan tibb işçilərinin könüllü təşkilatıdır.

Tibbi onkoloqlarla yanaşı, onkologiya sahəsi üzrə marağı və təhsili olan səhiyyə və ya tədqiqat sahəsində fəaliyyət göstərən mütəxəssislər, cərrahlar və şüa-terapevtlər AOC-yə üzv ola bilərlər. AOC üzvləri cəmiyyət tərəfindən təşkil edilən tədbirlərdə iştirak etməklə yanaşı, onlayn vəsaitlərə giriş imkanı və digər üstünlüklər əldə edirlər.

Cəmiyyət onkologiya sahəsi üzrə çalışan mütəxəssisləri bir araya gətirərək hər bir fərdi üzvün peşəkar şəbəkəsini genişləndirmək, bu sahə üzrə müzakirələr və fikir mübadiləsi aparmağı asanlaşdırır.

AOC tərəfindən onkologiya üzrə bilik mübadiləsinin aparılması, bu sahədə çalışan həkimlərin nəzəri və praktiki biliklərinin artırılması, o cümlədən yeni elmi nailiyyətlər və üsullar ilə bölüşmək məqsədilə hər ay iclaslar təşkil edilir. Hər iclasda həkimlər tərəfindən müxtəlif mövzularda məruzələr dinlənilir və geniş müzakirələr aparılır. Bununla yanaşı, AOC həmçinin beynəlxalq miqyasda tədbirlər təşkil edir. Dünyanın aparıcı mütəxəssisləri tədbirlərdə çıxış edərək öz bilik və təcrübələrini bölüşürlər. AOC-nin üzvü olan həkimlərə cəmiyyət tərəfindən təşkil edilən tədbirlərdə məruzələrlə çıxış etmək imkanı yaradılır.

AOC tərəfindən təşkil edilən konfranslar və digər tədbirlər Azərbaycan Respublikası Səhiyyə Nazirliyinin Elmi-Tibbi Şurası tərəfindən davamlı tibbi təhsil üzrə akkreditasiya olunur və tədbirlərdə iştirak etmiş həkimlərə müvafiq kredit vahidi verilir.

Tibb sahəsi üzrə təhsil alan və onkologiyaya marağı olan tələbələr də AOC-a qoşula bilərlər. Tələbələr cəmiyyətin fəaliyyətində könüllü kimi fəal iştirak edərək təcrübə qazana, həmçinin AOC-un üstünlüklərindən yararlana bilərlər. AOC-a qoşulmaq tələbələrə onkologiya sahəsində çalışan mütəxəssislərlə müntəzəm ünsiyyətdə olmaq imkanı yaradır və gələcəkdə bu sahə üzrə uğurlu karyera qurmağa kömək edir.

AOC-yə necə üzv olmaq olar?

1)aoc.com.az saytına daxil olaraq üzv olmaq bölməsinə keçid edin;

2)Qeydiyyat formasını dolduraraq “göndər” düyməsini basın;

3)Qeyd etdiyiniz elektron ünvana göndərilən təsdiq məktubundakı linkdən keçid edib tələb olunan sənədləri sistemə yükləyərək qeydiyyatınızı tamamlaya bilərsiniz. Hesabınız 24 saat ərzində aktivləşəcək.