Prolaktinoma hipofizin laktotrop hüceyrələrindən qaynaqlanan və artıq miqdarda PRL sekresiyasına səbəb olan adenomdur. Hipofiz adenomlar arasında (40%) ən çox rast gəlinir. İnsidansı milyonda 27, prevalansı milyonda 500-dür. Qadınlarda əsasən mikroprolaktinoma, kişilərdə isə makroprolaktinoma şəklində görülür.

Aztibb.az xəbər verir ki, bu barədə Azərbaycan Tibb Universitetinin Tədris-Terapevtik Klinikasının həkim-endokrinoloqu Ayan Məmmədova məlumat verib. 

Klinik əlamətləri:

1. Amenoreya, oliqomenareya;
2. Galaktoreya;
3. İnfertilite;
4. Artıq çəki;
5. Hirsutizm;
6. Osteopeniya/osteoparoz;
7. Adenoma bağlı görmə sinirinə təzyiq.

Diaqnoz necə qoyulur?

Diaqnoz qanda prolaktin səviyyəsini yoxlamaqla qoyulur. Prolaktin yüksəkliyinin hipotireoza bağlı olub-olmadığını bilmək üçün qalxanvari vəz hormonu da yoxlanılır. Dərman qəbulu mütləq araşdırılmalıdır. Hipofizdə kütləni yoxlamaq üçün MRT çəkilməlidir.

Prolaktinomanın müalicəsi:

Müalicəsi dərmanla aparılır və uzun müddət davam edir. Xəstələrə bromokriptin və ya kabergolin təyin edilir. Dərman qəbul edə bilməyən, dərmana dirəncli xəstələrdə və ya getdikcə böyüyən kütlələrdə cərrahi əməliyyat seçilə bilər.