Zaman-zaman gənclərin idman zallarında davamlı olaraq “ağırlıqqaldırma”, “bədən formalaşdırma”, “əzələbərkitmə” ilə məşğul olduğunu görürük. Lakin hər zamanmı bu istəklər sırf təbii enerji və ya orqanizmin natural gücü hesabına baş verir?

Televiziya və internet saytlarında, eləcə də xüsusi firmalar tərəfindən təklif olunan “proteinlər”, “anabolik steroidlər” və digər kimyəvi qarışıq tərkibli köməkçi vasitələrin istifadəsi onların fəsadını anlamadan qəbul edən gənclərdə dəb halını alıb.

Aztibb.az Salyan Rayon Mərkəzi Xəstəxanasına istinadla xəbər verir ki, bəzən cərrahiyyə və ümumən təbabət bu fəsadlar qarşısında aciz qalır.

Anabolik steroidlərin ürək, qan-damar sistemi xəstəliklərinə, cinsi zəifliyə, dölyaratma qabiliyyətinə, böyrək patalogiyalarına, sinir sistemi və immun sistem xəstəliklərinə səbəb ola bilər. Həmçinin qeyd olunan preparatların qəbulundan sonra daxili qanaxma baş verə bilər ki, bu zaman təxirəsalınmaz tibbi yardım göstərilməsinə zaman yetməz.

Pelioz hepatit nədir?

Anabolik steroidlərin qəbulundan sonra onların qaraciyərə kəskin toksik təsiri fonunda, qaraciyərdə tək və ya bir neçə ədəd sayda ölümə səbəb kistaların yaranmasıdır. Ölçüləri 5 mm-dən 5 sm-ə qədər və daha böyük ola bilir.

Adətən pelioz hepatit əlamətsiz keçir. Yəni insan hər hansı bir ağrı və ya narahatlıq hiss etməyə bilir. Qəflətən vəziyyətin pisləşməsi, təzyiqin enməsi, huşun itməsi isə artıq bu sistlərin partlaması və daxili qanaxmanın olmasını göstərir.

Bu, o deməkdir ki, əgər steroidlərdən istifadə edən idmançı davamlı tibbi müayinə olunmursa, qaraciyərdə və ümumən orqanizmdə gedən dəyişiklikləri nəzarət altında saxlamırsa, məhz bu halda ölümə gedən səbəbi də özü ilə daşıyır.

Beləliklə:

- Anabolik steroidlərin nəzarətsiz qəbulu çox təhlükəlidir;

- İdeal bədən quruluşuna aparan yol sizi bu zaman ölümə də apara bilər;

- Cərrahiyyə və ümumən təbabət bu qanaxmalarda çox zaman gücsüzdür.