Qeyri-steroid iltihab əleyhinə preparatların uzunmüddətli qəbulu analgetik nefropatiyaya səbəb olur.  Bu zaman böyrəklərin tubulointerstisial xarakterli zədələnməsi baş verir. 

 

Aztibb.az xəbər verir ki, bu preparatların yan təsirlərinin səbəb olduğu digər orqanların zədələnmələri (mədədə, beldə və sağ qabırğaaltı nahiyədə ağrılar; zəiflik, başgicəllənmə) fonunda ləng proqressivləşən böyrək çatışmazlığı müşahidə olunur.

 

Analgetik nefropatiyanın nisbətən çox rastlanan ağırlaşmaları bakterial infeksiyaların prosesə qoşulmasıdır; bu zaman ağır hərarət, hematuriya, pielonefrit təzahür edir. Bəzi tədqiqatçılar bu prosesi xəstəliyin sonlanma variantlarından biri hesab edir. Patologiyanın digər uzaq nəticəsi isə böyrək ləyənlərinin keçid hüceyrəli xərçəngidir. Analgetiklərdən sui-istifadə edən insanlarda bu onkoloji xəstəliyin inkişaf riski populyasiyadan 20 dəfə yüksəkdir. Bu preparatların kontrolsuz qəbulu fonunda mədə və onikibarmaq bağırsağın ağır xoralarınin əmələ gəlməsi, onların qanaması mümkündür. Ürək-damar sistemində də zədələnmələr baş verə bilər. Belə ki, ağrıkəsici preparatlar ateroskleroza səbəb ola bilər. Nefropatiya, həmçinin qan təzyiqinin yüksəlməsini təşviq edir. Bu, sonralar infarkt və insultun yaranma riskini artırır.

 

Diaqnostika böyrəklərin laborator və instrumental müayinələrinə (sidiyin analizi, USM, KT) əsaslanır.

 

Müalicə analgetiklərin qəbulunun dayandırılması və simptomatik terapiya ilə aparılır.