Uşaqlarınızı məcburi yedizdirməkdən çəkinin. İmkan verin ki, uşaq orqanizmi, xüsusən də onun beyni aclığı hiss etsin, qidalanma davranışı, reflekslər formalaşsın.

Aztibb.az xəbər verir ki, bunu pediatr Tərlan Əyyubov sosial şəbəkədə etdiyi paylaşımda deyib. O, uşaqların qidalandırılması və rejimi ilə bağlı valideynlərə mühüm tövsiyələr verib.

Həkim bildirib ki, uşaqlara gün rejimi tərtib edilməlidir. Onların dayələri və qohumlar da bu rejimlə tanış olmalı və ona riayət edilməsinə çalışmalıdır. Qidalanma rejimə salınmalı, yəni eyni saatlarda yemək verilməlidir:

"İştahsız uşaq yeməklər arası qidalandırılmamalıdır. Onlara rejimə düşənədək qidalar arasında adi sudan başqa heç nə verməməli, xüsusilə də, onlar karbohidratlarla (şəkərlə) zəngin qidalar - yəni çörək, konfet, bişmələr, şirin, kəmşirin, azacıq-şirin, mürəbbə məti, bal, meyvə, şirələr və qoz-fındıqdan uzaq tutulmalıdır.

Qidalar arası uşaqların iştahını yaxşılaşdırmaq üçün aktiv oyunlardan (qaçmaq, tullanmaq, və s.) istifadə etmək tövsiyə olunur. Bu qaydalara ciddi riayət etdikdə, adətən 10 gündən sonra orqanizmdə qidalanma refleksi yaranır və təyin olunmuş saatlarda uşaqlar acırlar".

Pediatrın sözlərinə görə, bir neçə saat ac qalmaq uşaqda problem yaratmaz. Əməliyyatlardan öncə və bəzən sonra da, müəyyən analizlərdən əvvəl uşaqları ac saxlayırlar.

"Əvəzində uşaq başa düşür ki, onun manipulyasiyaları artıq işə yaramır və o, taktikasını dəyişməyə başlayır. Beləliklə, valideynlər həm boş vaxt əldə edir, həm də əsəbləri pozulmur. Ailədə sakitlik uşağın tammənalı tərbiyəsi və inkişafı üçün ən vacib və mühüm faktordur", - deyə həkim əlavə edib.