Bəzi kritik vəziyyətlərdə ən vacib dərmanların əl atında olması lazımdır. Təəssüf ki, bəzən lazım gəlmədiyi hallarda da müxtəlif dərmanları yığıb saxlayanlar və lazım gələndə onları tapmaqda çətinliklə üzləşənlər olur. Hazırkı pandemiya dövründə tez-tez apteklərdən hər zaman əlçatan olan dərmanların yoxa çıxması ilə üzləşirik. Bu, ilk növbədə, həkim təyinatı ilə müntəzəm olaraq dərmanlar qəbul edənlərə mənfi təsir göstərir və həmin dərmanların birdən-birə apteklərdən yoxa çıxması onların narahatlığına səbəb olur.

Aztibb.az xəbər verir ki, bu sözləri Mərkəzi Gömrük Hospitalının həkim-terapevti Nərgiz Kərimova deyib.

“Yadda saxlamaq lazımdır ki, hər bir xəstəlik zamanı, o cümlədən virus xəstəliklərində yalnız həkimin təyin etdiyi dərmanlardan istifadə etmək lazımdır. Həkim dərman təyin edərkən, xəstənin anamnezinin bır sıra incəliklərini, dərmanların bir-biri ilə uyğunluq və ziddiyyətlərini, qarşılıqlı təsirinin xüsusiyyətlərini nəzərə alır. Həmin dərmanları özbaşına qəbul etmək mənfi nəticələrə, hətta ağırlaşmalara səbəb ola bilər. Hazırda elə xəstələr var ki, başqasına yazılmış reseptdən istifadə edir, bu, xəstəliyinin ağırlaşmasına səbəb olduqda isə deyir ki, qohum da bu dərmanları qəbul edib və sağalıb. Əslində o, bununla çox zərərli və yanlış üsulla öz xəstəliyini daha da şiddətləndirdiyinin fərqində olmur", - deyə həkim-terapevt bildirib.

Nərgiz Kərimovanın sözlərinə görə, hər orqanizm eyni deyil və birinə yaxşı təsir edən hər hansı dərman başqa birisinə əks təsir göstərə bilər. Hormonal preparatların və antibiotiklərin qəbuluna da maksimum dərəcədə ehtiyatla yanaşmaq lazımdır. Təəssüflər olsun ki, hazırda COVID-19 infeksiyasının yayılması ilə əlaqədar olaraq, xəstələr özbaşına olaraq belə dərmanları külli miqdarda qəbul etməklə, profilaktika məqsədilə bu cür səhvlərə yol verirlər. Özünümüalicə faydadan çox ziyan gətirə bilər.

O, əlavə edib ki, əl altında saxlanılan dərmanlara və ləvazimatlara sarğı materialları, yara, yanıq və qanaxmanın qarşısını almaq üçün istifadə olunan materiallar, ağrıkəsicilər, antihistamin preparatları və xəstənin mütəmadi olaraq qəbul etdiyi dərmanlar aiddir. Hər hansı xəstəlik zamanı yalnız həkimin təyin etdiyi dərmanlardan istifadə olunmalıdır, əks halda ciddi sağlamlıq problemləri yarana bilər.